អង្គការសកម្មភាពសម្រាប់ការអប់រំនៅកម្ពុជា (KAPE) បានបញ្ជូនតំណាងពីររូប លោក អ៊ុល រុន ទីប្រឹក្សាជាតិជាន់ខ្ពស់ និងលោក ស សុផាណាក់ អ្នកសម្របសម្រួលគម្រោង កំពុងបំពេញបេសកកម្មដើម្បីចូលរួមកិច្ចប្រជុំ គោលនយោបាយថ្នាក់តំបន់លើកទី១នៃគម្រោងការត្រៀមខ្លួនរបស់អាស៊ានដើម្បីទទួលយកបញ្ញាសិប្បនិម្មិត (1st Regional Policy Convening of AI Ready ASEAN) ចាប់ពី ថ្ងៃទី១២ ដល់ថ្ងៃទី ១៤ ខែកុម្ភៈ ឆ្នាំ២០២៥ នៅលេខាធិការដ្ឋានអាស៊ាននៃទីក្រុងហ្សាកាតា ប្រទេសឥណ្ឌូនេស៊ី ។ 

សន្និសីទដ៏មានកិត្យានុភាពនេះ រៀបចំដោយ មូលនិធិអាស៊ាន (ASEAN Foundation) និងឧបត្ថម្ភដោយក្រុមហ៊ុន Google.org នឹងត្រូវបានប្រារព្ធពិធីបើកដោយអគ្គលេខាធិការរងអាស៊ានទទួលបន្ទុកកិច្ចការសហគមន៍ និងសាជីវកម្ម ឯកឧត្ដម Nararya S. Soeprapto ដែលជាការចាប់ផ្តើម ជាផ្លូវការ នៃគម្រោង "ការត្រៀមខ្លួនរបស់អាស៊ានដើម្បីទទួល​យកបញ្ញាសិប្បនិម្មិត" (AI Ready ASEAN Project) ដែលជាគំនិតផ្តួចផ្តើមក្នុងតំបន់ដើម្បី បង្កើនចំណេះដឹង AI និងការប្រើប្រាស់ AI ប្រកបដោយការទទួលខុសត្រូវ ក្នុងចំណោមអ្នកអប់រំ យុវជន និងអ្នកបង្កើតគោលនយោបាយ។

តាមរយៈការចូលរួមរបស់អង្គការខេប ក្នុងនាមជាដៃគូអនុវត្តគម្រោងនេះនៅក្នុងប្រទេសកម្ពុជា យើងនឹងទទួលបាននូវការយល់ដឹងពីអ្នកជំនាញ AI ឈានមុខ អ្នកបង្កើតគោលនយោបាយ និងអ្នកពាក់ព័ន្ធចម្រុះវិស័យ ដើម្បីបន្តជំរុញកិច្ចសហប្រតិបត្តិការលើការរួមបញ្ចូល AI នៅក្នុងប្រព័ន្ធអប់រំរបស់កម្ពុជា។

ព្រឹត្តិការណ៍នេះនឹងរួមបញ្ចូល ការសន្ទនាគោលនយោបាយក្នុងតំបន់ វគ្គសិក្សាពង្រឹងសមត្ថភាព និងចូលរួមថ្នាក់បណ្តុះបណ្តាល AI ផ្ទាល់នៅទីស្នាក់ការកណ្តាលរបស់ក្រុមហ៊ុន Google ក្នុងប្រទេសឥណ្ឌូនេស៊ី។ ជាមួយនឹងការផ្លាស់ប្តូរការអប់រំដោយប្រើ AI យ៉ាងឆាប់រហ័ស ការចូលរួមរបស់អង្គការខេប នៅក្នុងកិច្ចប្រជុំនេះ គឺជាជំហានយុទ្ធសាស្ត្រឆ្ពោះទៅរកការប្រើប្រាស់ AI សម្រាប់ការអប់រំប្រកបដោយសមធម៌ និងនវានុវត្តន៍នៅក្នុងប្រទេសកម្ពុជា ស្របតាមគោលដៅទូលំទូលាយរបស់ប្រទេសលើការធ្វើបរិវត្តកម្មឌីជីថល និងការអភិវឌ្ឍបំណិនសតវត្សរ៍ទី ២១៕