នៅថ្ងៃទី២-៣ ខែតុលា ឆ្នាំ២០២៥ គម្រោងលើកកម្ពស់ការអប់រំឌីជីថលសម្រាប់សិស្សានុសិស្ស (IDEAL) ក្រោមជំនួយហិរញ្ញប្បទានពីអង្គការឆាលហ្វានកូរ៉េ បានរៀបចំសិក្ខាសាលាស្តីពី ការពង្រឹងសមត្ថភាពបណ្ណារក្សក្នុងការគ្រប់គ្រងបណ្ណាល័យ (លើកទី៣) នៅសាលប្រជុំវិទ្យាល័យព្រែកលៀប ដល់បណ្ណារក្សដែលជាសាលារៀនគោលដៅរបស់ខ្លួន។

វគ្គសិក្ខាសាលានេះ ផ្តោតសំខាន់ដូចខាងក្រោម៖

• យល់ដឹងអំពីតួនាទីរបស់បណ្ណាល័យជាផ្នែកមួយដ៏សំខាន់សម្រាប់គាំទ្រដល់ការអប់រំ។

• បង្ហាញពីសារៈសំខាន់នៃការអាន និងតួនាទីក្នុងការជំរុញការអភិវឌ្ឍផ្នែកអក្ខរកម្មរបស់សិស្ស។

• ការផ្លាស់ប្តូរចំណេះដឹង និងបទពិសោធន៍ផ្ទាល់ខ្លួនរបស់បណ្ណារក្ស ដែលទាក់ទងនឹងការអានសៀវភៅ និងការប្រើប្រាស់សម្ភារៈក្នុងបណ្ណាល័យ។

• ផ្តល់នូវវិធីសាស្ត្រថ្មីៗសម្រាប់បណ្ណារក្ស ដើម្បីណែនាំសិស្សានុសិស្សចូលរួមប្រើប្រាស់ធនធាន និងជំរុញសកម្មភាពនានានៅក្នុងបណ្ណាល័យរបស់សាលារៀន។

បណ្ណារក្សនឹងប្រើប្រាស់ពុទ្ធិដែលទទួលបានពីសិក្ខាសាលារួមមាន៖ វិធីសាស្ត្របែងចែកថ្នាក់សៀវភៅ ការគ្រប់គ្រងរដ្ឋបាលបណ្ណាល័យ និងការស្វែងយល់ខ្លឹមសារតាមរយៈសំណួរ ដើម្បីជួយបណ្ណារក្សឱ្យមានជំនាញ និងចំណេះដឹងក្នុងការប្រើប្រាស់បណ្ណាល័យ ពីព្រោះវាជាកន្លែងដ៏សំខាន់សម្រាប់គាំទ្រការសិក្សារបស់សិស្សប្រកបដោយប្រសិទ្ធភាព។

អ្នកគ្រូ ខិ សុគីម ជាបណ្ណារក្សនៅសាលាបឋមសិក្សាពោធិរាម្មា បានបង្ហាញចំណាប់អាម្មរណ៍ផ្ទាល់ខ្លួនថា “នាងខ្ញុំពិតជាសប្បាយចិត្តខ្លាំងណាស់ដែលគម្រោង IDEAL បានរៀបចំវគ្គបណ្តុះបណ្តាលស្តីពី ការគ្រប់គ្រងបណ្ណាល័យដល់បណ្ណារក្សឱ្យបានយល់ដឹងពីតួនាទីកាន់តែច្បាស់ក្នុងការបំពេញការងារក្នុងបណ្ណាល័យ រួមមាន៖ ការចុះក្បាលកូដសៀវភៅ ការបែងចែកថ្នាក់សៀវភៅ ការអាន និងសួរសំណួរ និងការរៀបចំបណ្ណាល័យឱ្យមានភាពងាយស្រួល ទាក់ទាញ និងសម្បូរបែបសម្រាប់សិស្សក្នុងការចូលអានសៀវភៅ។ ចំណុចសំខាន់ទាំងនេះ  ជាជំនួយដល់រូបនាងខ្ញុំជាបណ្ណារក្សដើម្បីរៀបចំផែនការសម្រាប់បំផុសការអាននៅក្នុងសាលារៀន។”

សិក្ខាសាលានេះ ត្រូវបានសហការរៀបចំឡើងដោយអង្គការ ខេប អង្គការ Good Neighbors កម្ពុជា និងអង្គការ World Diakonia ក្នុងគោលបំណងពង្រឹងសមត្ថភាពបណ្ណារក្ស ដើម្បីជំរុញសកម្មភាពអំណាននៅក្នុងបណ្ណាល័យឱ្យកាន់តែសកម្មសម្រាប់បម្រើជាប្រយោជន៍ដល់ការសិក្សារបស់សិស្ស៕