នៅដើមខែកក្កដានេះ គម្រោងលើកកម្ពស់ការអប់រំឌីជីថលសម្រាប់សិស្សានុសិស្ស ដែលហៅកាត់ថា គម្រោង IDEAL បានរៀបចំកម្មវិធីចុះជួបផ្ទាល់ជាមួយសាលារៀនគោលដៅចំនួន១២សាលានៅក្នុងខេត្តកណ្តាល និងរាជធានីភ្នំពេញ ដែលក្នុងនោះមានបឋមសិក្សាចំនួន៥ អនុវិទ្យាល័យចំនួន៤ និងវិទ្យាល័យចំនួន៣។

កម្មវិធីនេះរៀបចំធ្វើឡើងដើម្បីសិក្សាអំពីស្ថានភាពជាក់ស្តែងរបស់សាលារៀនទាំង១២ ទាំងវឌ្ឍនភាព បញ្ហាប្រឈម និងតម្រូវការផ្សេងៗ ជាពិសេសការសិក្សាទៅលើបន្ទប់បណ្ណាល័យ និងបន្ទាប់កុំព្យូទ័រ ដែលគម្រោងនឹងធ្វើការជួសជុលឡើងវិញ ដោយមានបំពាក់គ្រឿងសង្ហារិមទំនើបៗ ថាប្លែត និងកុំព្យូទ័រដើម្បីឱ្យសិស្សងាយស្រួលទទួលបាននូវការអប់រំឌីជីថល។

សាលាគោលដៅទាំង១២នឹងទទួលបានកុំព្យូទ័រយួរដៃ (Laptop) បន្ទប់កុំព្យូទ័រ ថាប្លែត ឧបករណ៍បញ្ចាំងស្លាយ (LED Projectors) ទូរទស្សន៍ (Smart TVs) និងការជួសជុលបណ្ណាល័យសតវត្សរ៍ទី២១។ ក្នុងនាមជាអង្គការដៃគូប្រតិបត្តិគម្រោង អង្គការ ខេប នឹងរៀបចំវគ្គបណ្តុះបណ្តាលផ្នែក ICT និងអក្ខរកម្មឌីជីថលសម្រាប់គ្រូបង្រៀន និងអ្នកគ្រប់គ្រងសាលា ដោយប្រើប្រាស់កម្មវិធីសិក្សាអក្ខរកម្មឌីជីថលដែលមានស្រាប់ ដូចជា កញ្ចប់ឯកសារបណ្តុះបណ្តាលអក្ខរកម្មឌីជីថលខ្មែរ (KDLP) (ត្រូវបានអភិវឌ្ឍឡើងដោយក្រុមហ៊ុនមេតា/Meta) ឯកសារបណ្តុះបណ្តាលស្ដីពីប្រព័ន្ធផ្សព្វផ្សាយ ព័ត៌មាន និងអក្ខរកម្មឌីជីថល​ (ត្រូវបានគាំទ្រដោយអង្គការយូណេស្កូ) និងឯកសារដ៏ទៃទៀតពីកម្មវិធីសាលារៀនជំនាន់ថ្មី។

ថ្នាក់ដឹកនាំ និងលោកគ្រូអ្នគ្រូទាំង១២សាលាបានបង្ហាញនូវកិច្ចសហការយ៉ាងរលូនក្នុងការអនុវត្តគម្រោង IDEAL របស់អង្គការ ខេប ដែលគាំទ្រថវិកាដោយអង្គការឆាលហ្វានកូរ៉េ​ ក្នុងរយៈពេល៣ឆ្នាំដែលចាប់ផ្តើមពីខែមករា ឆ្នាំ២០២៤ រហូតដល់ខែធ្នូ ឆ្នាំ២០២៦។

#idealproject #kapeprojects