សមិទ្ធិផលជោគជ័យ និងគំនិតផ្តួចផ្តើមថ្មី

ការផ្លាស់ប្តូរការសិក្សា និងការរស់នៅតាមរយៈអក្ខរកម្មបញ្ញាសិប្បនិម្មិត (AI Literacy)

 

នៅក្នុងយុគសម័យដែលបច្ចេកវិទ្យាកំពុងវិវឌ្ឍយ៉ាងឆាប់រហ័ស ការត្រៀមខ្លួនសម្រាប់អនាគតគឺជាកត្តាចាំបាច់។ យុវតី ទឹមសម្បត្តិ សូលីកា សិស្សថ្នាក់ទី ១០B នៃវិទ្យាល័យសង្កែ ស្ថិតក្នុងខេត្តបាត់ដំបង បានក្លាយជាគំរូដ៏លេចធ្លោមួយរូបបន្ទាប់ពីបានចូលរួមក្នុងគម្រោងការត្រៀមខ្លួនរបស់អាស៊ាន ដើម្បីទទួលយកបញ្ញាសិប្បនិម្មិត (AI RAP)។ ពីមុន សូលីកា គ្រាន់តែជាអ្នកប្រើប្រាស់អ៊ីនធឺណិតធម្មតាដែលពឹងផ្អែកលើ Google និង YouTube ដើម្បីស្វែងរកព័ត៌មាន ប៉ុន្តែក្រោយការចូលរួមវគ្គបណ្តុះបណ្តាលស្ដីពី "អក្ខរកម្មបញ្ញាសិប្បនិម្មិត (AI Literacy)" ដែលរៀបចំដោយគម្រោង AI Ready ASEAN រួចមក នាងបានប្រែក្លាយខ្លួនទៅជាអ្នកប្រើប្រាស់បច្ចេកវិទ្យាប្រកបដោយភាពឆ្លាតវៃ និងមានទំនុកចិត្ត។

 

វគ្គបណ្តុះបណ្តាលនេះបានបើកបង្ហាញឱ្យ សូលីកា យល់ច្បាស់ថា AI មិនមែនជាអ្វីដែលស្មុគស្មាញ ឬគួរឱ្យភ័យខ្លាចនោះទេ ផ្ទុយទៅវិញវាគឺជាឧបករណ៍ដែលបង្កើតឡើងដើម្បីជួយមនុស្សឱ្យគិត និងរៀនបានកាន់តែប្រសើរ។ នាងបានចាប់យកចំណេះដឹងស្នូលអំពីរបៀបដែល AI ដំណើរការ ការយល់ដឹងពីការយល់ខុសទាក់ទងនឹង AI និងជាពិសេសគឺក្រមសីលធម៌នៃការប្រើប្រាស់ប្រកបដោយសុវត្ថិភាព។

 

ផលជះវិជ្ជមាននៃចំណេះដឹងនេះបានស្តែងចេញយ៉ាងច្បាស់តាមរយៈសកម្មភាព ៤ យ៉ាងធំៗ គឺ៖

 

១) ប្រសិទ្ធភាពក្នុងការសិក្សា និងស្រាវជ្រាវ៖ សូលីកា លែងចំណាយពេលរាប់ម៉ោងក្នុងការស្វែងរកទិន្នន័យដែលគ្មានប្រភពច្បាស់លាស់ទៀតហើយ។ នាងប្រើប្រាស់ AI ជាជំនួយការក្នុងការសង្ខេបមេរៀន ស្វែងយល់ពីប្រធានបទស្មុគស្មាញ និងបង្កើតគំនិតថ្មីៗសម្រាប់ការសិក្សា។ នេះធ្វើឱ្យនាងរៀនបានលឿនជាងមុន និងមានពេលច្រើនសម្រាប់ផ្តោតលើការវិភាគស៊ីជម្រៅ។

 

២) ការចែករំលែកចំណេះដឹង (Knowledge Sharing)៖ ដោយមើលឃើញថា ធនធានគ្រូបង្រៀនផ្នែក AI នៅកម្ពុជានៅមានកម្រិត សូលីកា បានដាក់ចិត្តក្លាយជា "ទូតសុឆន្ទៈឌីជីថល" ក្នុងសហគមន៍របស់នាង។ នាងបានយកចំណេះដឹងនេះទៅចែករំលែកដល់មិត្តភក្តិ និងបងប្អូន ដើម្បីឱ្យពួកគេយល់ថា AI អាចជួយសម្រួលកិច្ចការប្រចាំថ្ងៃបានយ៉ាងដូចម្តេច។

 

៣) ភាពច្នៃប្រឌិតក្នុងជីវិតប្រចាំថ្ងៃ៖ លើសពីការសិក្សា សូលីកា បានប្រើប្រាស់ AI ដើម្បីដោះស្រាយបញ្ហាក្នុងជីវិតរស់នៅ និងបង្កើតគម្រោងច្នៃប្រឌិតផ្សេងៗ។ នាងយល់ច្បាស់ថា ម៉ាស៊ីនមិនអាចឆ្លាតជាងមនុស្សទេ ប៉ុន្តែវាអាចធ្វើឱ្យមនុស្សធ្វើការបានឆ្លាតជាងមុន។

 

៤) ការត្រៀមខ្លួនសម្រាប់អាស៊ាន និងសកលលោក៖ សូលីកា យល់ថាគម្រោង AI Ready ASEAN គឺជាជំហានដ៏សំខាន់។ ការចេះប្រើប្រាស់ AI ថ្ងៃនេះ គឺការកក់កៅអីសម្រាប់ការងារ និងឱកាសនាពេលអនាគត ខណៈដែលពិភពលោកកំពុងបោះជំហានទៅមុខមិនឈប់ឈរ។

 

យុវតី ទឹមសម្បត្តិ សូលីកា មិនត្រឹមតែជាសិស្សដែលរៀនពូកែប៉ុណ្ណោះទេ ប៉ុន្តែនាងគឺជាតំណាងនៃយុវជនកម្ពុជាជំនាន់ថ្មី ដែលហ៊ានទទួលយកបច្ចេកវិទ្យា ប្រើប្រាស់វាដោយការទទួលខុសត្រូវ និងមានឆន្ទៈចែករំលែកដើម្បីវឌ្ឍនភាពសង្គម។ ភាពជោគជ័យរបស់នាង គឺជាសក្ខីភាពបញ្ជាក់ថា "អក្ខរកម្ម AI" គឺជាកូនសោរដ៏សំខាន់សម្រាប់បើកទ្វារអនាគត។

 

យុវតី ទឹមសម្បត្តិ សូលីកា បាននិយាយដោយអារម្មណ៍ជឿជាក់ថា "ការរៀនអក្ខរកម្មបញ្ញាសិប្បនិម្មិត (AI Literacy) គឺជាឱកាសដ៏មានតម្លៃបំផុតសម្រាប់ពួកយើងក្នុងនាមជាយុវជនកម្ពុជា ព្រោះបច្ចុប្បន្នធនធានអ្នកជំនាញដែលអាចចែករំលែកចំណេះដឹងនេះនៅមានកម្រិតនៅឡើយ។ ខ្ញុំចង់ប្រាប់ទៅសិស្សទាំងអស់ថា AI មិនមែនជារឿងស្មុគស្មាញ ឬគួរឱ្យខ្លាចដែលមកជំនួសយើងនោះទេ ប៉ុន្តែវាគឺជាដៃគូដ៏ពូកែដែលជួយឱ្យយើងរៀនបានលឿន ធ្វើការបានងាយស្រួល និងអាចបង្កើតអ្វីៗគ្រប់យ៉ាងប្រកបដោយភាពច្នៃប្រឌិតឥតដែនកំណត់ "។

 

យុវតី សូលីកា បានលើកឡើងបន្តទៀតថា "AI មិនអាចឆ្លាតជាងមនុស្សទេ ប៉ុន្តែការចេះប្រើ AI នឹងធ្វើឱ្យយើងក្លាយជាមនុស្សដែលពោរពេញដោយសមត្ថភាព។ ចូរកុំខ្លាចវា តែត្រូវប្រើវាដើម្បីអភិវឌ្ឍខ្លួនយើង "។

 

គម្រោងការត្រៀមខ្លួនរបស់អាស៊ាន ដើម្បីទទួលយកបញ្ញាសិប្បនិម្មិត​(AI RAP) ត្រូវបានប្រតិបត្តិដោយអង្គការ ខេប សហការជាមួយនាយកដ្ឋានបរិវត្តកម្មឌីជីថល (DDT) នៃក្រសួងអប់រំ យុវជន និងកីឡា​ ត្រូវបានដឹកនាំដោយមូលនិធិអាស៊ាន និងគាំទ្រដោយក្រុមហ៊ុន Google.org គឺជាកម្មវិធីថ្នាក់តំបន់ ត្រូវបានបង្កើតឡើងដើម្បីលើកកម្ពស់ចំណេះដឹងអំពីបច្ចេកវិទ្យាបញ្ញាសិប្បនិម្មិត (AI) និងការសរសេរកូដតាមរយៈ Hour of Code ដែលជាចលនាសកលដើម្បីណែនាំវិទ្យាសាស្ត្រកុំព្យូទ័រដល់មនុស្សគ្រប់វ័យ។ គម្រោងនេះមានគោលបំណងធ្វើឱ្យការសរសេរកូដ និង AI ក្លាយជារឿងសាមញ្ញ សប្បាយ និងអាចប្រើប្រាស់បានសម្រាប់សិស្ស គ្រូបង្រៀន ឪពុកម្តាយ និងសហគមន៍នៅទូទាំងបណ្តាប្រទេសអាស៊ាន៕

 

#AIReadyASEAN #kapepeprojects #AISuccessStory #AI #AILiteracy #AILiteracyTraining #NGO #kapecambodia #ASEANFoundation