សមិទ្ធិផលជោគជ័យ និងគំនិតផ្តួចផ្តើមថ្មី

លោកគ្រូ លាង បញ្ញរ៉ា ជាគ្រូបង្គោលកម្មវិធីអក្ខរកម្មឌីជីថលខ្មែរ និងជាគ្រូបង្រៀនផ្នែកICT នៅវិទ្យាល័យព្រះស៊ីសុវត្ថិជំនាន់ថ្មី។ លោកបានចូលរួមជាមួយកម្មវិធីនៅក្នុង ខែកុម្ភៈ ឆ្នាំ២០២៤។

មេរៀននៅក្នុងកម្មវិធីអក្ខរកម្មឌីជីថលខ្មែរបានផ្តល់ឱ្យសិស្សទទួលបានចំណេះដឹងមូលដ្ឋានគ្រឹះពីការប្រើប្រាស់ប្រព័ន្ធបច្ចេកវិទ្យាឱ្យកាន់តែល្អប្រសើរដូចជា ស្គាល់ពីអត្តសញ្ញាណឌីជីថល សារៈសំខាន់ និងក្រមសីលធម៌នៃការប្រើប្រាស់ឌីជីថល និងភាពជាពលរដ្ឋឌីជីថល ជាពិសេសបានដាស់តឿនដល់ពួកគេក្នុងការប្រើប្រាស់អ៊ីនធឺណិត ឱ្យមានការប្រុងប្រយ័ត្នខ្ពស់ឡើង។ ទន្ទឹមនឹងនោះ សិស្សក៏ចេះថែរក្សាឯកជនភាពផ្ទាល់ខ្លួននៅលើបណ្តេញសង្គម។

អំឡុងពេលបង្រៀនប​ញ្ហាដែលលោកបានជួបប្រទះ គឺអត្ថន័យនៃពាក្យនៅលើស្លាយពិបាកយល់ ដូច្នេះសិស្សពន្យល់ខ្លឹមសារមេរៀនមិនបានល្អពេលពិភាក្សាក្រុម។ ដើម្បីដោះស្រាយបញ្ហានេះ លោកបានបង្កើតកម្រងសំណួរ និងដាក់កិច្ចការស្រាវជ្រាវដល់សិស្សា។ ជាលទ្ធផល លោកកត់សម្គាល់ឃើញថា ការធ្វើបទបង្ហាញរបស់ពួកគេល្អជាងមុន និងមានភាពប្រឡាក់ក្រឡាគ្នាពីចំណុចមួយទៅចំណុចមួយក្នុងការបកស្រាយ។

“កម្មវិធីអក្ខរកម្មឌីជីថលខ្មែរ មានសារៈសំខាន់សម្រាប់ការរៀនសូត្រ ជាពិសេសសម្រាប់សិស្សនៅតាមបណ្ដាលខេត្តដែលពួកគេមិនចេះ និងមិនដឹងពីកម្មវិធីឌីជីថល ដែលមិនមែនសិស្សនៅក្នុងទីប្រជុំជននោះឡើយ។ ខ្ញុំកំណត់សម្គាល់ឃើញថា មានមេរៀនមួយចំនួនហាក់ដូចជាពិបាកសម្រាប់សិស្សានៅកម្រិតអនុវិទ្យាល័យក្នុងការសិក្សា ព្រោះខ្លឹមសារមេរៀនខ្លះ គឺវាសម្រាប់សិស្សនៅកម្រិតសាកលវិទ្យាល័យ” នេះជាការលើកឡើងរបស់លោកគ្រូ បញ្ញរ៉ា។

លោកបានបន្ថែមទៀតថា ​សិស្សមិនសូវយកចិត្តទុកដាក់ ក្នុងកម្មវិធីអក្ខរកម្មឌីជីថលខ្មែរនោះឡើយ ព្រោះដោយសារមុខវិជ្ជានេះសិស្សមិនទទួលបានពិន្ទុដូចមុខវិជ្ជាផ្សេងៗទៀតដែលមានការប្រលង ហេតុនេះគាត់មិនសូវខិតខំប្រឹងប្រែងយកចិត្តទុកដាក់នោះឡើយ។

លោកសូមសំណូមពរដល់កម្មវិធី សូមជួយកែសម្រួលខ្លឹមសារមេរៀន ភាសាអង់គ្លេសបកប្រែឱ្យចំពាក្យ ពង្រីកទំហំអក្សរឱ្យធំជាងមុន ដើម្បីងាយស្រួលក្នុងសកម្មភាពរៀននិងបង្រៀន។ ព្រោះខ្ញុំចង់ឱ្យកូនសិស្សទាំងអស់ទទួលបានគុណភាព យ៉ាងហោចណាស់សិស្សទទួលបាន៥០ ទៅ៦០ភាគរយក្រោយពេលរៀនចប់។ 

ជាចុងក្រោយ 

សូមឱ្យអ្នកប្រើប្រាស់បណ្តាញសង្គមទាំងអស់ ប្រសិនបើអ្នកបានឃើញព័ត៌មានមិនពិតនៅលើអនឡាញ ត្រូវចេះហ៊ានរបាយការណ៍ ​ និង បិទផេកនោះ ដើម្បីចូលរួមទំស្កាត់ព័ត៌មានក្លែងក្លាយទាំងអស់គ្នា។