“ថ្ងៃនេះគឺជាសិក្ខាសាលាពិគ្រោះយោបល់លើកទី៤ហើយដែលយើងបានធ្វើការសិក្សាលើមុខវិជ្ជា ICT ដោយផ្តោតពីថ្នាក់ទី៧ដល់ទី១១។ យើងសិក្សាអំពី Network, WAN, LAN និងពាក់ព័ន្ធនឹងប្រព័ន្ធរូបូទី (Robotics) និងប្រព័ន្ធកូដ១០។ សម្រាប់ថ្នាក់ទី១១ដែលយើងកំពុងរៀបចំកម្មវិធីសិក្សានេះ គឺវាអាចដូចទៅនឹងកម្រិតសាកលវិទ្យាល័យដែលនៅក្នុងឆ្នាំទី១ គេឱ្យសិក្សាមុខវិជ្ជា ICT ហ្នឹងដែរ។ បើប្រៀបធៀបទៅនឹងការសិក្សារបស់ខ្ញុំនៅសាកលវិទ្យាល័យ គឺសិក្សាលើចំណុចគោលៗទេ ប៉ុន្តែសិក្ខាសាលាថ្ងៃនេះ ខ្ញុំបានសិក្សាលម្អិតច្បាស់ទៅលើប្រព័ន្ធគោលពីរ ដេស៊ីម័រ ហើយនឹងអុកតា ជាពិសេសការសរសេរកូដនៅក្នុងកម្មវិធី Python ព្រមទាំងសិក្សាទៅលើប្រព័ន្ធ Network (ដូចជា WAN, MANs និង LAN។ លោកគ្រូអ្នកគ្រូដែលចូលរួមសិក្ខាសាលានៅថ្ងៃនេះ គឺមានសមត្ថភាពខ្ពស់ជាងមុនដោយសារបានសិក្សាបន្ថែមពីកម្មវិធី NOREC Exchange ពីប្រទេសបង់ក្លាដេស។ ដោយសារយើងដាក់កម្មវិធីនេះទៅក្នុងសាលារៀនជំនាន់ថ្មីទាំង៦សាលានៅកម្រិតវិទ្យាល័យ កូនសិស្សមានសមត្ថភាពផ្នែក ICT ខ្ពស់ជាងឆ្នាំមុន។ ប្រសិនបើកម្មវិធីនេះដាក់ចូលទៅក្នុងសាលារៀនផ្សេងក្រៅពីសាលារៀនជំនាន់ថ្មីទៀតនោះ វារឹតតែធ្វើឱ្យសិស្សរបស់យើងកាន់តែមានសមត្ថភាព”។ ខាងលើនេះគឺជាការលើកឡើងដោយអ្នកគ្រូ ស៊ិន ឡៃហ៊ាង ជាគ្រូប្រឹក្សាគរុកោសល្យ និងគ្រូបង្រៀន ICT នៅសាលារៀនជំនាន់ថ្មីក្រុងកំពង់ចាម នៅក្នុងអំឡុងពេលសិក្ខាសាលាពិគ្រោះយោបល់កម្មវិធីសិក្សា ​ICT នៃកម្មវិធីផ្លាស់ប្តូរបទពិសោធន៍បុគ្គលិក (NOREC Exchange Program) ដែលរៀបចំឡើងដោយអង្គការ ខេប នៅសាលប្រជុំក្រុមហ៊ុនធនធានអប់រំ (TTO) កាលពីថ្ងៃទី២៣-២៤ ខែឧសភា ឆ្នាំ២០២៤ ស្ថិតក្នុងក្រុងកំពង់ចាម។ សិក្ខាសាលានេះមានសិក្ខាកាមដែលជាគ្រូបង្រៀន ICT មកពីសាលារៀនជំនាន់ថ្មី និងបុគ្គលិកអង្គការ ខេប សរុបចំនួន២១នាក់។

សិក្ខាសាលានេះបានផ្តល់ជូនលោកគ្រូអ្នគ្រូ ICT នូវគំនិត ចំណេះដឹង និងបទពិសោធន៍ពីកម្មវិធីសិក្សាថ្មីមកពីបង់ក្លាដេស និងដើម្បីបញ្ចូលផ្នែកកម្មវិធីសិក្សាថ្មីៗដែលល្អទាំងនេះទៅក្នុងកម្មវិធីសិក្សាធម្មតា ហើយកាត់បន្ថយចំណុចខ្វះខាតនៅក្នុងកសារសិក្សាបែបឌីជីថលក្នុងចំណោមសិស្ស ជាពិសេស ICT សម្រាប់វិជ្ជាជីវៈ។

កម្មវិធីផ្លាស់ប្តូរបទពិសោធន៍បុគ្គលិកនេះគាំទ្រដោយទីភ្នាក់ងារ NOREC។